Фармадипин 2%, 5 мл, капли

Сипаттама

Дәрілік затты медициналық қолдану

жөніндегі нұсқаулық

ФАРМАДИПИН^®

Саудалық атауы

Фармадипин^®

Халықаралық патенттелмеген атауы

Нифедипин

Дәрілік түрі

Ішуге арналған тамшылар 2%, 5 мл және 25 мл

Құрамы

1 мл препараттың құрамында

белсенді зат: 100 % құрғақ затқа шаққанда

20 мг нифедипин;

қосымша заттар: полиэтиленгликоль 400, этанол (96 %)

Сипаттамасы

Мөлдір сары немесе жасылдау-сары түсті, спирттің әлсіз иісі бар тұтқыр сұйықтық

Фармакотерапиялық тобы

Жүрек-қантамыр жүйесі. Кальций өзекшелерінің блокаторлары. Кальций өзекшелерінің қантамырларға әсері басым селективті блокаторлары.Дигидропиридин туындылары. Нифедипин.

ATХ коды C08C A05.

Фармакологиялық қасиеттері

Фармакокинетикасы

Сіңірілуі

Ішке қабылдағанда асқорыту жолында жақсы сіңеді, биожетімділігі – 40-60%. Әсері әсіресе сублингвальді қабылдағанда өте жылдам (5-10 минуттан соң) дамиды. Әдетте, ең жоғарғы әсері 30-40 минуттан соң тіркеледі. Ас ішу препараттың сіңу жылдамдығына айтарлықтай әсер етпейді.

Таралуы

Гемодинамикалық әсері 4-6 сағат бойы сақталады. Қан плазмасы ақуыздарымен нифедипиннің 90 %-ға дейінгісі байланысады.

Метаболизмі

Бауырда метаболизденеді және организмнен көбінесе белсенді емес метаболиттер түрінде шығарылады.

Шығарылуы

Нифедипиннің жалпы клиренсі - 0,4-тен 0,6 л/кг/сағатқа дейін. Жартылай шығарылу кезеңі 2-4 сағатты құрайды. Егде жастағы адамдар мен бауыр циррозы бар пациенттерде нифедипиннің метаболизмі баяулайды, сондықтан оларда препараттың жартылай шығарылу кезеңі 2 есе дерлік ұзаруы мүмкін, бұл дозасын азайтуды және препаратты қабылдаулар аралығын арттыруды қажет етеді. Организмде нифедипин жинақталмайды. Азғантай мөлшерлерде гематоэнцефалдық және плацентарлық бөгеттер арқылы өтеді, емшек сүтімен бөлініп шығады.

Фармакодинамикасы

Нифедипин жүрек қыспасына қарсы және гипертензияға қарсы әсер береді. Кальций иондарының кардиомиоциттерге және коронарлық және шеткері артериялардың тегісбұлшықетті жасушаларына жасуша жарғақшаларының баяу потенциалға тәуелді кальций өзекшелері арқылы өтуін бөгейді. Қантамырлардың тегіс бұлшықеттерін босаңсытады, түйілулерді жояды және коронарлық және шеткері артерияларды кеңейтеді, шеткері қантамырлық кедергіні, артериялық қысымды, кейінгі жүктемені және миокардқа оттегі қажеттілігін азайта отырып; миокардтың жиырылғыштығын елеусіз төмендетеді, тромбоциттер агрегациясын біраз азайтады.

Қолданылуы

- артериялық гипертензияда (гипертензиялық криздерді емдеу мақсатында).

Қолдану тәсілі және дозалары

Фармадипин^® препаратын гипертониялық кризді емдеу үшін шұғыл көмек беру препараты ретінде қолданады.

Препараттың бұл дәрілік түрін курстық қабылдау үшін қолдану ұсынылмайды.

Гипертензияға қарсы емдеу курсын жүргізу қажет болса, препарат пен дәрілік түрін дәрігер таңдайды.

Артериялық қысым кенеттен және елеулі жоғарылағанда ересектерге арналған бастапқы бір реттік дозасы 3-5 тамшы (2-3,35 мг) құрайды, егде жастағы адамдар үшін – 3 тамшыдан асырмай (2 мг) тіл астына немесе кепкен нан немесе қант кесегіне тамызып, ауызда барынша ұзағырақ ұстау керек. Тиімділігі жеткіліксіз болса, дозасын біртіндеп клиникалық маңызды әсеріне дейін арттыруға болады. Ары қарай артериялық қысым жоғарылаған жағдайларда дәл осы дозасын бағдарға алу қажет. Қажет болса (АҚ 190/100 мм сын. бағ. – 220/110 мм сын. бағ. дейін жоғарылауы) бір реттік дозасын жекелеген жағдайларда біртіндеп 10-15 тамшыға дейін (6,7-10 мг) науқастағы АҚ көрсеткіштерінің жекелей өзгерістерін ескере отырып арттыруға болады.

Жекелеген науқастардың Фармадипин^® препаратына жекелей сезімталдығын ескеру қажет. Мұндай жағдайларда дозасын, 3 тамшыдан бастап, және клиникалық әсеріне жеткенше біртіндеп 2-3 тамшыға дейін (1,34-2 мг) арттыра отырып, әр адамға жекелей таңдайды.

Препараттың бастапқы дозасын арттыру артериялық қысымның күрт төмендеуіне алып келуі мүмкін!

Жағымсыз әсерлері

Препаратты қолдану жөніндегі ұсынымдар сақталған жағдайда, жағымсыз құбылыстар елеусіз және өтпелі болып, әдетте, емдеуді тоқтатуды қажет етпейді.

Жиі және бақылаусыз қолданылғанда, осы фармакологиялық топтың препараттарға тән жағымсыз реакциялар болуы мүмкін.

Жағымсыз реакциялар ағзалар жүйелері (MedDRA сәйкес) және туындау жиілігі бойынша жіктелген: өте жиі (≥1/10), жиі (≥1/100 және <1/10), жиі емес ((≥1/1000 және <1/100), сирек ((≥1/10000 және <1/1000) және өте сирек (<1/10000), белгісіз – қолжетімді мәліметтерден анықтау мүмкін емес.

Жиі: бас ауыруы, ісіну, вазодилатация, іш қатуы, дімкәстану сезімі.

Жиі емес: аллергиялық реакциялар, аллергиялық ісіну /ангиоісіну (көмейдің ісінуін қоса*), мазасыздық реакциялары, ұйқы бұзылыстары, вертиго, бас сақинасы, бас айналуы, тремор, тахикардия, жүрек соғуының күшеюі, гипотензия, естен тану, мұрыннан қан кету, мұрынның бітелуі, асқазан-ішек жолының ауыруы және абдоминальді ауыру, жүрек айнуы, диспепсия, метеоризм, эритема, полиурия, дизурия.

Сирек: анемия, лейкопения, тромбоцитопения, қышыну, есекжем, бөртпелер, қозу, парестезия, дизестезия, гипергликемия (қант диабеті бар науқастарда ескеру керек), көру бұзылулары, диспноэ, бұлшықеттердің құрысулары, буындардың ісінуі, эректильді дисфункция, спецификалықемес ауыру, қызба, балтырдың ісінуі.

Өте сирек: анафилаксиялық/анафилактоидтық реакция, ауыздың құрғауы, қызыл иектердің гиперплазиясы (ұзақ уақыт қолданғанда), құсу, бауыр ферменттері белсенділігінің транзиторлық жоғарылауы.

Белгісіз: агранулоцитоз, ұйқышылдық, гипостезия, көздің ауыруы, кеуденің ауыруы (стенокардия), безоар, дисфагия, ішек бітелуі, ішектің ойық жарасы, гастроэзофагеальді сфинктер жеткіліксіздігі, сарғаю, уытты эпидермалық некролиз, фотосезімталдық, пурпура, артралгия, миалгия.

*өмірге қауіп төндіретін салдарларға алып келуі мүмкін.

Қатерлі гипертензиясы мен гиповолемиясы бар, гемодиализ жүргізілетін пациенттерде, вазодилатация салдарынан артериялық қысымның едәуір төмендеуі байқалуы мүмкін.

Қолдануға болмайтын жағдайлар

- жедел миокард инфарктісі (бастапқы 4 аптада)

- кардиогендік шок

- ауыр аортальді және митральді стеноз

- тұрақсыз стенокардия

- стенокардия ұстамаларын емдеу, миокард инфарктісінің салдарлы профилактикасы үшін пайдалануға болмайды

- жүректің декомпенсацияланған жеткіліксіздігі

- артериялық гипотензия (систолалық артериялық қысым (АҚ) 90 мм сн. бағ. төмен)

- қарыншалық тахикардиялар QRS кешенінің кеңеюімен

- синустық түйін әлсіздігі синдромы

- Вольф-Паркинсон-Уайт (WPW) синдромы, Лаун-Генонг-Левайн (LGL) синдромы

- II және III дәрежелі AV блокада

- порфирия

- проктоколэктомиядан кейін орнатылған илеостома

- нифедипинге және препараттың басқа компоненттеріне жоғары сезімталдық

- басқа дигидропиридиндерге жоғары сезімталдық

- рифампицинмен бір мезгілде қабылдауға болмайды

- жүктілік

- бала емізу кезеңі

- 18 жасқа дейінгі балаларға

Дәрілермен өзара әрекеттесуі

Нифедипиннің тиімділігіне әсер ететін препараттар. Нифедипин ішектің шырышты қабығы мен бауырда болатын Р450 3А4 цитохромы жүйесі арқылы метаболизденеді. Осыған байланысты, аталған ферменттер жүйесін тежейтін немесе индукциялайтын препараттар, нифедипиннің «алғаш өтуін» (ішу арқылы қолданғаннан кейін) немесе клиренсін өзгертуі мүмкін.

Нифедипинді төменде келтірілген препараттармен бірге қолданғанда, өзара әрекеттесуінің дәрежесі мен ұзақтығын ескеру керек.

Рифампицин. Рифампицин Р450 3А4 цитохромы жүйесін едәуір индукциялайды. Рифампицинмен бір мезгілде қолданғанда, нифедипиннің биожетімділігі едәуір төмендейді және, сол арқылы, оның тиімділігі әлсірейді. Осыны ескере отырып, нифедипиннің рифампицинмен біріктірілімін қолдануға болмайды.

Р450 3А4 цитохромы жүйесінің төменде келтірілген әлсіз немесе орташа тежегіштерін бір мезгілде қолданғанда, артериялық қысымды бақылау қажет және, қажет болған жағдайда, нифедипиннің дозасын төмендету туралы мәселені қарастыру керек.

Макролидтік антибиотиктер (мысалы, эритромицин). Неулер жүргізілген жоқ. Белгілі бір макролидтік антибиотиктер басқа препараттардың Р450 3А4 цитохромы жүйесі түрткі болған метаболизмін тежейді. Осыны ескере отырып, екі препаратты бір мезгілде қолданғанда, нифедипиннің плазмадағы концентрациясының артуы ықтималдығын жоққа шығаруға болмайды.

Құрылымы жағынан макролидтік антибиотиктер класына ұқсайтын азитромицин CYP3А4 тежемейді.

Анти-АИТВ протеаза тежегіштері (мысалы, ритонавир). Нифедипин мен белгілі бір анти-АИТВ протеаза тежегіштерінің өзара әрекеттесуі ықтималдығын зерттейтін клиникалық зерттеу әлі жүргізілген жоқ. Аталған кластың препараттары Р450 3А4 цитохромы жүйесін тежейтіні белгілі. Бұдан өзге, осы кластың препараттары нифедипиннің Р450 3А4 цитохромы жүйесі түрткі болған метаболизмін in vitro тежейді. Нифедипинмен бір мезгілде қолданғанда, алғаш өтуі кезінде метаболизмінің төмендеуі және организмнен шығарылуының төмендеуі салдарынан, нифедипиннің плазмадағы концентрациясының едәуір жоғарылайтындығын жоққа шығаруға болмайды.

Азолдық антимикотиктер (мысалы, кетоконазол). Нифедипин мен белгілі бір азолдық антимикотиктердің өзара әрекеттесуі ықтималдығын зерттейтін клиникалық зерттеу әлі жүргізілген жоқ. Аталған кластың препараттары Р450 3А4 цитохромы жүйесін тежейтіні белгілі. Нифедипинмен бір мезгілде ішу арқылы қолданғанда, алғаш өтуі кезіндегі метаболизмінің төмендеуі салдарынан, нифедипиннің биожетімділігі едәуір жоғарылайтындығын жоққа шығаруға болмайды.

Флуоксетин. Нифедипин мен флуоксетиннің өзара әрекеттесуі ықтималдығын зерттейтін клиникалық зерттеу әлі де жүргізілген жоқ. Флуоксетин нифедипиннің Р450 3А4 цитохромы жүйесі түрткі болған метаболизмін in vitro тежейді. Екі препаратты бір мезгілде қолданғанда, нифедипиннің плазмадағы концентрациясының жоғарылайтындығын жоққа шығаруға болмайды.

Нефазодон. Нифедипин мен нефазодонның өзара әрекеттесуі ықтималдығын зерттейтін клиникалық зерттеу әлі де жүргізілген жоқ. Нефазодон басқа препараттардың Р450 3А4 цитохромы жүйесі түрткі болған метаболизмін in vitro тежейтіні белгілі. Екі препаратты бір мезгілде қолданғанда, нифедипиннің плазмадағы концентрациясының артатындығын жоққа шығаруға болмайды.

Хинупристин/дальфопристин. Хинупристин/дальфопристин мен нифедипинді бір мезгілде қолдану нифедипиннің плазмадағы концентрациясының жоғарылауына алып келуі мүмкін.

Вальпрой қышқылы. Нифедипин мен вальпрой қышқылының өзара әрекеттесуі ықтималдығын зерттеу мақсатындағы клиникалық зерттеу әлі жүргізілмеген. Ферменттердің тежелуі салдарынан, вальпрой қышқылы құрылымы жағынан ұқсас кальций өзекшелерінің блокаторы нимодипиннің плазмадағы концентрациясын арттырады. Осыны ескере отырып, нифедипиннің плазмадағы концентрациясының жоғарылайтындығын және тиімділігінің артатындығын жоққа шығаруға болмайды.

Циметидин. Р450 3А4 цитохромының тежелуі салдарынан, циметидин нифедипиннің плазмадағы концентрациясын арттырады және гипертензияға қарсы әсерін күшейтуі мүмкін.

Цизаприд. Цизаприд пен нифедипинді бір мезгілде қолдану нифедипиннің плазмадағы концентрациясының жоғарылауына алып келуі мүмкін.

Р450 3А4 цитохромы жүйесін индукциялайтын, фенитоин, карбамазепин және фенобарбитал сияқты эпилепсияға қарсы дәрілер.

Фенитоин Р450 3А4 цитохромы жүйесін индукциялайды. Фенитоинмен бір мезгілде қолданғанда, нифедипиннің биожетімділігі төмендейді, ал тиімділігі әлсірейді. Екі препаратты бір мезгілде қолданғанда, нифедипинмен емдеуге клиникалық жауапты бақылау және, қажет болған жағдайда, нифедипиннің дозасын арттыру туралы мәселені қарастыру қажет. Екі препаратты бір мезгілде қолданғанда нифедипиннің дозасын арттырған кезде, фенитоинді тоқтатқанда, нифедипиннің дозасын төмендету туралы мәселені қарастыру керек.

Нифедипин мен карбамазепиннің немесе фенобарбиталдың өзара әрекеттесуі ықтималдығын зерттеуге мақсатында клиникалық зерттеулер жүргізілген жоқ. Екі препарат та ферменттер индукциясының салдарынан, құрылымы жағынан ұқсас кальций өзекшелерінің блокаторы нимодипиннің плазмадағы концентрациясын төмендететіні белгілі. Осыны ескере отырып, нифедипиннің плазмадағы концентрациясының төмендеуін және тиімділігінің азаюын жоққа шығаруға болмайды.

Гипертензияға қарсы препараттар. Нифедипин бір мезгілде қолданылатын: диуретиктер, β-блокаторлар, АӨФ тежегіштері, АТ-1 рецепторлардың антагонистері, кальцийдің басқа антагонистері, α-адренергиялық блокаторлар, ФДE5 тежегіштері, α-метилдопа, магний сульфаты сияқты гипертензияға қарсы препараттардың гипертензияға қарсы әсерін арттыруы мүмкін.

Нифедипинді β-блокаторлармен бір мезгілде қолданғанда, пациентке мұқият мониторинг жүргізу қажет, өйткені, жүрек жеткіліксіздігі өршуінің бірен-саран жағдайлары белгілі.

Дигоксин. Нифедипин мен дигоксинді бір мезгілде қолданғанда, дигоксиннің клиренсі төмендеуі және дигоксиннің плазмадағы концентрациясы жоғарылауы мүмкін. Осыны ескере отырып, пациентте дигоксиннің артық дозалану симптомдарының бар-жоқтығын бақылау қажет және қажет болса, дигоксиннің плазмадағы концентрациясын ескере отырып, гликозидтің дозасын төмендету керек.

Хинидин. Нифедипин мен хинидинді бір мезгілде қолданғанда жекелеген жағдайларда хинидин деңгейінің төмендегені, ал нифедипинді тоқтатқанда – хинидиннің плазмадағы концентрациясының күрт жоғарылағаны байқалған. Осыны ескере отырып, нифедипинді бір мезгілде қолданғанда немесе тоқтатқанда, плазмадағы хинидин концентрациясына мониторинг жүргізу, ал қажет болса, хинидиннің дозасын түзету ұсынылады. Кейбір авторлар екі препаратты бір мезгілде қолданғанда нифедипиннің плазмадағы концентрациясының жоғарылағаны туралы хабарлаған, алайда, басқа авторлар нифедипин фармакокинетикасының өзгерістерін байқамаған.

Осыны ескере отырып, нифедипинмен емдеу кестесіне хинидинді қосқанда артериялық қысымды мұқият бақылау керек. Қажет болған жағдайда, нифедипиннің дозасын төмендету керек.

Такролимус. Такролимустың Р450 3А4 цитохромы жүйесі арқылы метаболизденетіні белгілі. Жарияланған мәліметтер жекелеген жағдайларда, нифедипинмен бір мезгілде қолданғанда такролимустың дозасын азайтуға болатынын көрсетеді. Екі препаратты бір мезгілде қолданғанда плазмадағы такролимус концентрациясына мониторинг жүргізу керек, және қажет болған жағдайда, такролимустың дозасын төмендету мәселесін қарастыру керек.

Өзара әрекеттесулерінің басқа түрлері

Грейпфрут шырыны. Грейпфрут шырыны Р450 3А4 цитохромы жүйесін тежейді. Нифедипинді қолдану кезінде грейпфрут шырынын пайдалану препараттың плазмадағы концентрациясының жоғарылауына және бірінші өтуі кезінде метаболизмінің төмендеуі немесе клиренсінің төмендеуі салдарынан нифедипин әсерінің ұзақтығының артуына алып келеді. Осының салдарынан препараттың гипертензияға қарсы әсері күшеюі мүмкін. Грейпфрут шырынын жүйелі пайдаланудан соң бұл әсері шырынды соңғы пайдаланғаннан кейін 3 күн бойына созылуы мүмкін.

Осыны ескере отырып, нифедипинмен емдеу кезінде грейпфруттың/грейпфрут шырынының пайдаланылуын болдырмау керек.

Нифедипинді қолдану несептегі ванилилминдаль қышқылының концентрациясын спектрофотометриялық жолмен анықтау кезіндегі жалған жоғары нәтижелердің алынуына әкеп соғуы мүмкін (алайда, тиімділігі жоғары сұйықтықты хроматография әдісін қолданғанда бұл әсері байқалмайды).

Айрықша нұсқаулар

Айқын артериялық гипотензия (систолалық қысым 90 мм сн. бағ.), жүректің айқын жеткіліксіздігі кезінде Фармадипин^® препаратын сақтықпен қолдану керек.

Обструкциялық симптомдардың туындауы мүмкіндігіне байланысты, асқазан-ішек жолының қатты тарылуы бар пациенттерге Фармадипин^® препаратын қолданғанда сақ болу қажет. Аса сирек жағдайда, безоарлар туындауы мүмкін, олар хирургиялық араласымды қажет етуі мүмкін.

Бірен-саран жағдайларда, анамнезде асқазан-ішек жолы тарапынан бұзылулар болмаған жағдайда, обструкциялық симптомдар сипатталған.

Фармадипин^® препаратын мықын-ішек резервуары (проктоколэктомиядан кейінгі илеостомасы) бар пациенттерге қолдануға болмайды.

Фармадипин^® препаратын қолдану барийлі контрастылы затты пайдаланылатын рентген зерттеуі кезінде жалған оң нәтижелердің алынуына әкеп соқтыруы мүмкін (мысалы, толтырылу ақаулары полип ретінде интерпретацияланады).

Бауыр функциясының бұзылулары бар пациенттер мұқият мониторингілеуді, ал ауыр жағдайларда – дозасын төмендетуді қажет етеді.

Нифедипин Р450 3А4 цитохромы жүйесі арқылы метаболизденеді, соған байланысты, аталған ферменттер жүйесін тежейтін немесе индукциялайтын препараттар нифедипиннің «алғаш өтуін» немесе клиренсін өзгертуі мүмкін.

Р450 3А4 цитохромы жүйесінің әлсіз немесе орташа тежегіштері болып табылатын және нифедипиннің плазмадағы концентрациясының артуына алып келуі мүмкін препараттарға: макролидтік антибиотиктер (мысалы, эритромицин), анти-АИТВ протеаза тежегіштері (мысалы, ритонавир), азолдық антимикотиктер (мысалы, кетоконазол), антидепрессанттар нефазодон және флуоксетин, хинупристин/дальфопристин, вальпрой қышқылы, циметидин жатады.

Фармадипин^® препаратын аталған препараттармен бірге қолданғанда, артериялық қысымды бақылау, және қажет болған жағдайда, нифедипиннің дозасын төмендету туралы мәселені қарастыру қажет.

Жекелеген in vitro эксперименттерден кальций антагонистерін, атап айтқанда, нифедипинді қолдану мен сперматозоидтардың қайтымды ұрықтануға қабілеттілікті нашарлататын биохимиялық өзгерістері арасында өзара байланыстылық анықталған. Егер ұрықтануға in vitro әрекеттенулер сәтсіз болып шықса, басқа түсіндірмелері болмаса, кальций антагонистерін, мысалы, нифедипинді, осы құбылыстың ықтимал себебі ретінде қарастыруға болады.

Егер, нифедипиннің алдыңғы қолданылуы мен ишемиялық ауыру арасында байланыстылық болуы мүмкін болса, препаратты қолданбау керек. Стенокардиясы бар пациенттерде ұстамалар жиірек туындауы мүмкін, ал олардың ұзақтығы мен қарқындылығы, әсіресе, емдеудің басында жоғарылауы мүмкін.

Әсер етуші заты нифедипин болып табылатын дәрілік заттарды тұрақты стенокардияның жедел ұстамасы бар пациенттерге қолданбайды.

Препаратты гемодиализдегі пациенттерге, қатерлі артериялық гипертензия немесе гиповолемия кезінде айрықша сақтықпен тағайындау керек, өйткені, қантамырлардың кеңеюі оларда артериялық қысымның елеулі төмендеуін туғызуы мүмкін. Нифедипинді қант диабетімен науқастарға қолдану емді түзетуді қажет етуі мүмкін.

Бұл дәрілік заттың құрамында аздаған мөлшерде, бір дозасында 100 мг-ден аз этанол (алкоголь) бар.

Педиатрияда қолданылуы

Препаратты балаларды (18 жасқа дейінгі) емдеу үшін қолданбайды Жүктілік және лактация кезеңінде қолданылуы

Нифедипин емшек сүтіне өтеді, сондықтан препаратты қолданған кезде бала емізуді тоқтату керек.

Препараттың көлік және қауіптілігі зор механизмдермен жұмыс жасау қабілетіне әсер ету ерекшеліктері

Препаратты қолданғанда зейін қоюды (автокөлік жүргізу, механизмдерді басқару және т.б.) қажет ететін қызмет түрлерінен бас тарту керек.

Артық дозалануы

Нифедипинмен жедел уыттанудың симптомдары: сананың комаға дейінгі бұзылуы, артериялық қысымның төмендеуі, тахикардия/брадикардия, гипергликемия, метаболикалық ацидоз, гипоксия, өкпенің ісінуімен қатар жүретін кардиогендік шок.

Емі. Шұғыл көмек көрсету шаралары ең алдымен препаратты организмнен шығаруға және тұрақты гемодинамиканы қалпына келтіруге бағытталуы тиіс.

Ішу арқылы қолданғаннан кейін асқазанды толығымен тазарту, қажет болған жағдайда – ас ішекті жуып-шаюмен біріктіру ұсынылады.

Препаратты организмнен шығару әсіресе, баяу босап шығатын нифедипин препараттарымен уыттану жағдайларында, әсер етуші затының сіңірілуін болдырмау үшін, ас ішекті қоса, айтарлықтай толық жүргізілуі тиіс.

Нифедипин үшін қан плазмасы ақуыздарымен байланысу дәрежесінің жоғарылығыжәне таралу көлемінің салыстырмалы түрде аз екендігі тән болғандықтан, гемодиализ тиімсіз, алайда, плазмафорез жүргізу ұсынылады.

Брадикардияны бета-симпатомиметиктермен басуға болады. Жүрек ырғағының өмірге қауіп төндіретін баяулауы кезінде жасанды ырғақ жетекшісін қолдану ұсынылады.

Кардиогендік шок және вазодилатация салдарынан туындаған гипотензияны кальций препараттарымен жоюға болады (10-20 мл 10 % кальций хлориді немесе глюконаты ерітіндісін вена ішіне баяу енгізеді, сосын қажет болса қайталайды). Осының салдарынан кальцийдің сарысудағы деңгейлері қалыптың жоғарғы шегіне жетуі немесе біраз жоғарылауы мүмкін. Егер кальцийді енгізудің тиімділігі жеткіліксіз болса, допамин немесе норадреналин сияқты симптоматиктерді қолдану талапқа сай болып табылады. Бұл препараттардың дозалары қол жеткізілген емдік әсерін ескере отырып таңдалады.

Қосымша сұйықтық енгізуге аса сақтық тұрғысынан келу керек, өйткені бұл жүрекке артық күш түсу қаупін арттырады.

Шығарылу түрі және қаптамасы

5 мл препараттан құтыларға арналған, алғаш ашылуы бақыланатын, тамшылатқыштары бар полиэтилен қақпақтармен тығындалған қоңыр шыныдан жасалған құтыларға құйылған. Немесе 25 мл препараттан тамшылатқыш тығындармен тығындалған және бұралатын қақпақтары бар жарықтан қорғайтын шыныдан жасалған құтыларда, немесе 25 мл-ден құтыларға арналған, алғаш ашылуы бақыланатын, тамшылатқыштары бар полиэтилен қақпақтармен тығындалған қоңыр шыныдан жасалған құтыларға құйылған. Құтыларға өздігінен желімденетін заттаңбалар жапсырылады. Әр құты медициналық қолдану жөніндегі қазақ және орыс тілдеріндегі нұсқаулықпен бірге картоннан жасалған қорапшаға салынады.

Сақтау шарттары

Түпнұсқалық қаптамасында, 25 °С-ден аспайтын температурада сақтау керек.

Балалардың қолы жетпейтін жерде сақтау керек!

Сақтау мерзімі

3 жыл.

Құтысын ашқаннан кейін сақтау мерзімі 28 тәулік.

Жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецепт арқылы.

Өндіруші

«Фармак» ЖАҚ, Украина, 04080, Киев қ., Фрунзе к-сі, 74.

Тіркеу куәлігінің ұстаушысы

«Фармак» ЖАҚ, Украина

Қазақстан Республикасы аумағында тұтынушылардан дәрілік заттардың сапасына қатысты шағымдарды (ұсыныстарды) қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері (телефон, факс, электронды пошта)

«Фармак» ЖАҚ Қазақстан Республикасындағы өкілдігі

Қазақстан Республикасы, Алматы қ., индексі 050012, Аманагелді к-сі 59 "А" "Шартас" Бизнес орталығы, 9 қабат. Тел./факс: +7 (727) 267 63 73, электронды пошта: а.aspetova@farmak.kz

Қалалар